एक कुटुंब, तीन आमदार, तीन पक्ष..'या' कुटुंबाला लागला जॅकपॉट
लॉटरी किंग सँटियागो मार्टिन यांच्या कुटुंबातील तिघेजण आमदार झाले आहेत. यामध्ये त्यांची पत्नी, जावई आणि मुलगा यांचा समावेश आहे. विशेष म्हणजे या तिघांनी वेगवेगळ्या पक्षांकडून निवडणूक लढवली होती.
ADVERTISEMENT
बातम्या हायलाइट
एक कुटुंब, तीन आमदार, तीन पक्ष..
'या' कुटुंबाला लागला जॅकपॉट
Lottery King Family in Assembly Elections 2026 : भारताचे 'लॉटरी किंग' म्हणून प्रसिद्ध असलेल्या सँटियागो मार्टिन यांच्या कुटुंबासाठी तामिळनाडू आणि पुद्दुचेरीच्या निवडणुका एखाद्या लॉटरीपेक्षा कमी ठरल्या नाहीत. या दोन्ही राज्यांच्या निवडणुकीत त्यांच्या कुटुंबातील तीन सदस्यांनी तीन जागांवर विजय मिळवला आहे. सँटियागो मार्टिन यांची पत्नी लीमा रोज मार्टिन, जावई आधव अर्जुन आणि मुलगा जोस चार्ल्स मार्टिन यांनी तामिळनाडू आणि पुद्दुचेरीमध्ये विजय मिळवला आहे. या तिघांमध्ये आधव अर्जुन रेड्डी यांचा विजय सर्वात महत्त्वाचा मानला जात आहे. मार्टिन कुटुंबाचा हा विजय दक्षिण भारताच्या राजकारणातील त्यांचा वाढता प्रभाव अधोरेखित करतो. विशेष म्हणजे, वेगवेगळ्या पक्षांकडून निवडणूक लढवूनही कुटुंबातील हे तिन्ही सदस्य मतदारांचा विश्वास जिंकण्यात यशस्वी ठरले आहेत.
जावई आणि पत्नीचा विजय
आधव अर्जुन हे अभिनेते ते राजकारणी बनलेले थलपथी विजय यांच्या 'तमिळगा वेत्री कळघम' (TVK) पक्षातील सर्वात विश्वासू सहकाऱ्यांपैकी एक आहेत. त्यांनी विल्लिवाक्कम मतदारसंघातून निवडणूक लढवली आणि 17, 302 मतांच्या मोठ्या फरकाने शानदार विजय मिळवला. आधव अर्जुन हे सँटियागो मार्टिन यांची कन्या डेझी मार्टिन यांचे पती असून, टीव्हीकेचे सरचिटणीस म्हणून त्यांनी पक्षाच्या विजयात मोठी भूमिका बजावली आहे. आधव अर्जुन यांच्याशिवाय सँटियागो मार्टिन यांच्या पत्नी लीमा रोज मार्टिन यांनीही तामिळनाडूतील लालगुडी मतदारसंघातून विजय संपादन केला आहे. लीमा यांनी अण्णा द्रमुकच्या (AIADMK) तिकिटावर निवडणूक लढवली होती. या जागेवर त्यांना द्रमुक (DMK) आणि टीव्हीके (TVK) उमेदवारांकडून कडवे आव्हान मिळाले होते, तरीही लीमा यांनी सुमारे 2,500 मतांच्या निसटत्या फरकाने विजय मिळवला.
हे ही वाचा : Maharashtra Weather : राज्यात सूर्य आग ओकणार, तर 'या' ठिकाणी पाऊस धिंगाणा घालणार; 7 जिल्ह्यांना टेन्शन
मुलाचा आहे स्वत:चा पक्ष
पुद्दुचेरीमध्ये एनडीएचा (NDA) घटक असलेल्या 'लचिया जननायक कळची' पक्षाने आपल्या पहिल्याच विधानसभा निवडणुकीत उत्कृष्ट कामगिरी केली आहे. या पक्षाने दोन जागांवर निवडणूक लढवली आणि एका जागेवर विजय मिळवला. या पक्षाची स्थापना गेल्या वर्षी डिसेंबरमध्ये सँटियागो मार्टिन यांचा मुलगा जोस चार्ल्स मार्टिन यांनी केली होती. जोस चार्ल्स हे व्यवसायाने उद्योजक आहेत. यावेळी त्यांनी कामराज नगर विधानसभा मतदारसंघातून निवडणूक लढवली आणि 10,205 मतांच्या फरकाने विजय नोंदवला.
हे ही वाचा : पवारांच्या NCP ला मोठा धक्का, 'तिने' भाजप मंत्र्याच्या पत्नीला हरवलं पण आता गमावलं 'सगळ्यात मोठं' पद
दक्षिण भारतातील आगामी राजकारणाची दिशा
मार्टिन कुटुंबाच्या या विजयाने तामिळनाडू आणि पुद्दुचेरीच्या राजकीय वर्तुळात मोठी खळबळ उडवून दिली आहे. एकाच कुटुंबातील तीन सदस्यांनी वेगवेगळ्या पक्षांतून आणि विचारसरणीतून निवडणूक लढवूनही मतदारांची पसंती मिळवणे ही बाब कौतुकास्पद मानली जात आहे. सँटियागो मार्टिन यांची व्यावसायिक पार्श्वभूमी आणि आता त्यांच्या कुटुंबाचा राजकारणातील हा यशस्वी प्रवेश दक्षिण भारतातील आगामी राजकारणाची दिशा ठरवणारा ठरू शकतो. या विजयामुळे मार्टिन कुटुंबाची राजकीय ताकद आता केवळ एका पक्षापुरती मर्यादित न राहता विविध आघाड्यांवर विस्तारली असल्याचे स्पष्ट झाले आहे.
