Jitendra Awhad : माझी अटक सरकारचा कट, कारवाईचं मनापासून स्वागत; जामीनही घेणार नाही

यानंतर माध्यमांशी बोलताना जितेंद्र आव्हाड यांनी आपण या अटकेचं मनापासून स्वागत करत असल्याचं म्हटलं आहे. ते म्हणाले, आज दुपारी 1 वाजता मला वर्तकनगर पोलीस स्टेशनचे वरिष्ठ पोलीस निरीक्षक निकम यांचा फोन आला. नोटीस घेण्यासाठी मी माणूस पाठवतो नाहीतर तुम्ही पोलीस स्टेशनला या असे ते म्हणाले. मी मुंबईला जायला निघालो होतो. मी म्हटलं कि, मी पोलीस स्टेशनला येतो आणि नंतर मी मुंबईला जातो.

मी पोलीस स्टेशनला गेलो असताना त्यांनी मला गप्पांमध्ये गुंतवून ठेवलं. त्यानंतर डीसीपी राठोड पोलीस स्टेशनला आले. त्यांच्या डोळ्यांत आणि चेहऱ्यावरती अस्वस्थपणा दिसत होता. हतबलता दिसत होती. ते आदराने म्हणाले कि, मी काही करु शकत नाही. वरुन आदेश आले आहेत. तुम्हांला अटक करावी लागेल. पण यात DCP राठोड यांची काही चुकी नाही. हे पोलिसी राज आहे, असा आरोप आव्हाड यांनी केला.

आव्हाड पुढे म्हणाले, हर हर महादेव चित्रपट ज्यात इतिहासाचे विकृतीकरण झाले. शिवाजी महाराजांची बदनामी झाली, मराठा समाजाची बदनामी झालीय. त्या चित्रपटावर मी आक्षेप घेतल्यामुळे माझ्यावर कारवाई होत असेल तर मी शिवाजी महाराजांचा प्रचंड मोठा रक्षक आहे, अभ्यासक आहे आणि मला हे सरकार रोखू इच्छित आहे शिवाजी महाराजांचा खरा इतिहास सांगण्यापासून, याचा मला प्रचंड आनंद आहे.