निवडणूक आयोगाने कायद्याचा चुकीचा अर्थ लावला, निवडणुका पुढे ढकल्यानंतर देवेंद्र फडणवीसांचं मोठं वक्तव्य

हेही वाचा : पुणे : विवाहित महिलेचा लग्न कर म्हणून तगादा, प्रियकराने गळा दाबून संपवलं, मृतदेह धाराशिवमध्ये पेट्रोल टाकून जाळला

देवेंद्र फडणवीस म्हणाले, निवडणूक आयोगाने कायद्याचा चुकीचा अर्थ लावला आहे. कुठला कायदा निवडणूक आयोग काढतोय. ते मला माहित नाही, माझ्या अभ्यासानुसार निवडणुका पुढे ढकलता येत नाही. या ठिकाणी निवडणूक पुढे ढकलणं अत्यंत चुकीचं आहे. उद्या निवडणुका आहेत आणि आज निवडणुका पुढे ढकलतात हे खूप चुकीचं आहे. अनेक उमेदावारांची प्रचाराची मेहनत वाया गेली. निवडणूक आयोग स्वायत्त असलं तरीही अशाप्रकारे निर्णय घेणं चुकीचंच आहे. याबद्दल रिप्रेझंटेशन आम्ही निवडणुक आयोगाला देऊ, असंही देवेंद्र फडणवीसांनी सांगितले.

राज्यातील 246 नगरपालिका आणि 42 नगरपंचायतींच्या निवडणुकांचा आता पुढील टप्पा सुरू झाला असून, काही ठिकाणी संपूर्ण नगरपालिका/नगरपंचायतींसाठी तर काही ठिकाणी केवळ प्रभागांसाठीचे मतदान २० डिसेंबर रोजी पार पडणार आहे. या निवडणुकांचे निकाल 21 डिसेंबरला जाहीर केले जातील. ज्या नगरपालिका किंवा नगरपंचायतींमध्ये सदस्यपदासाठी निवडणूक लढवणाऱ्या उमेदवारांविरोधात न्यायालयात याचिका दाखल आहे, त्या प्रभागांतील निवडणूक राज्य निवडणूक आयोगाने स्थगित केली आहे. तसेच ज्या ठिकाणी अध्यक्षपदाच्या उमेदवारांविरोधात याचिका दाखल आहे, त्या ठिकाणी संपूर्ण नगरपालिका किंवा नगरपंचायतीची निवडणूक स्थगित करून तिथे आता 20 डिसेंबरला मतदान घेण्याचा निर्णय झाला आहे. आक्षेपांवरील निर्णय देताना झालेला विलंब, अर्ज मागे घेण्यासाठी मिळालेला मर्यादित कालावधी आणि त्याचदरम्यान उमेदवारांना वितरित झालेली चिन्हे यांसारख्या कारणांमुळे राज्य निवडणूक आयोगाने या काही ठिकाणच्या निवडणुका स्थगित करण्याचे आदेश दिले आहेत. त्यामुळे या निवडणुका 2 डिसेंबरऐवजी 20 डिसेंबरला पार पडणार आहेत.