Cabinet Expansion in Maharashtra : शाह, शिंदे आणि फडणवीसांमध्ये काय झाली चर्चा?
महाराष्ट्राचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी दिल्लीत केंद्रीय गृहमंत्री अमित शाह यांची भेट घेतली. या भेटीत मंत्रिमंडळ विस्तारावर चर्चा झाली.
ADVERTISEMENT
Maharashtra Cabinet Expansion Latest News : मुख्यमंत्री एकनाथ शिंदे यांच्या नेतृत्वाखालील सरकारचा मंत्रिमंडळाचा विस्तार कधी होणार? हा प्रश्न गेल्या काही महिन्यांपासून सातत्याने चर्चेत आहे. सुप्रीम कोर्टाच्या महाराष्ट्रातील सत्तासंघर्षाच्या निकालानंतर मंत्रिमंडळ विस्तार होणार, असंही म्हटलं गेलं. दरम्यान, आता शिंदे-फडणवीसांनी मंत्रिमंडळ विस्तारासाठी हालचालींना वेग दिला आहे. रविवारी मध्य मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी दिल्लीत जाऊन केंद्रीय गृहमंत्री अमित शाह यांच्याशी खलबतं केली. या बैठकीनंतर लवकरच मंत्रिमंडळ विस्तार होणार असल्याची माहिती समोर आली आहे. (maharashtra cabinet expansion in marathi)
राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी रविवारी दिल्लीत केंद्रीय गृहमंत्री अमित शाह यांची भेट घेतली. ही भेट काही विषयांवर चर्चा करण्यासाठी होती, असं मुख्यमंत्री शिंदे यांनी माध्यमांशी बोलताना सांगितलं. पण, सूत्रांच्या माहितीनुसार अमित शाह, शिंदे आणि फडणवीस यांच्यात मंत्रिमंडळ विस्तारासंदर्भात चर्चा झाली.
शिवसेनेच्या वर्धापन दिनापूर्वी मंत्रिमंडळ विस्तार?
दिल्लीत झालेल्या भेटीगाठीनंतर शिंदे-फडणवीस सरकारचा मंत्रिमंडळ विस्तार 19 जूनपूर्वी होण्याची शक्यता व्यक्त केली जात आहे. 19 जून रोजी शिवसेनेचा वर्धापन दिन आहे. शाह यांच्यासोबतच्या बैठकीत शिवसेनेच्या वर्धापन दिनापूर्वी मंत्रिमंडळ विस्तार व्हावा, अशी भूमिका मुख्यमंत्री शिंदे यांनी मांडली असल्याचे वृत्त आहे.
हेही वाचा >> ‘भाजप कल्याणमध्ये उमेदवार देणार कोण म्हणालं?’, श्रीकांत शिंदे संतापले
लोकसभा निवडणुकीच्या अनुषंगाने दिलं जाणार स्थान
भाजपकडून लोकसभा 2024 ची तयारी सुरू आहे. त्यामुळे महाराष्ट्रात मंत्रिमंडळ विस्तार करताना लोकसभा निवडणुका नजरेसमोर ठेवूनच आमदारांना मंत्रिमंडळात स्थान दिलं जाणार असल्याची माहिती आहे. महाराष्ट्रात 45 जागा जिंकण्याचं लक्ष्य ठेवलं आहे. त्यामुळे पक्षाला निवडणुकीत अधिकाधिक यश मिळवून देण्यास फायदेशीर ठरणाऱ्या नेत्यांना मंत्रिमंडळ विस्तारात स्थान देण्याला प्राधान्य दिलं जाणार असल्याचे समजते. त्याचबरोबर मंत्रिमंडळ विस्तार करताना महिलांना संधी दिली जाणार आहे, त्यामुळे विस्तार झाल्यास कुणाच्या गळ्यात मंत्रिपदाची माळ पडणार, हे बघावं लागेल.
हे वाचलं का?
